eyeliner tutorial | أنواع الآيلاينر وخطوات رسم الآيلاينر

السلام عليكم ورحمة الله وبركاته ~

اليوم رح احكي عن الآيلاينر بالتفصيل، أنواعه، كيفية رسم الآيلاينر، خطوات ممكن تساعدك بإتقان الآيلاينر .

1- أنواع الآيلاينر :

1-أول نوع هو أقلام الكحل العادية، ممكن تستخدميها بالآيلاينر بس لازم تكون كريمية مشان ينرسم معك بسهولة . 

2- النوع الثاني هو الآيلاينر السائل، هاد النوع بكون لونه كتير قوي ، هاد الآيلاينر نوعين : الأول اللي متل القلم نفس اللي على اليمين والنوع التاني اللي هوي الو فرشة رفيعة نفس اللي على اليسار ، مشكلة النوع التاني أنو صعب التعامل معو وبسرعة بينشف فلو خربطتي لازم تمسحي بمزيل ، يعني لو كنتي لسا جديد بدك تتعلمي آيلاينر ماتستخدمي لأنو كتير صعب.أنا مابعرف اسوي  آيلاينر بهدول النوعين ، فمابعرف شو الأنواع المنيحة ولا إذا استخدامه حلو =|  .

3- النوع الثالث اللي هوي الجل آيلاينر، هاد النوع من رأيي أفضل شي لأنو بتقدري تتحكمي كيف مابدك بالآيلاينر و أستخدامه أسهل الشي ، في كتير أنواع في ميبلين (اللي بالصورة) وفي بإنجلوت في بماك في ببوبي براون ، أنا جربت ميبلين كتير كريمي وسهل استخدامه وضد الماء ( waterproof)  ، بتجي معو فرشة ، على فكرة الفرشة مو سيئة يعني ممكن تستخدميها بس أنا بفضل أنواع تانية، لتستخدمي هاد الآيلاينر عندك نوعين فرش بتستخدمي اللي بيرحك .

أول نوع من الفرش هيي اللي بتجي رفيعة وهي اللي بستخدمها غالبا بحس إستخدامها سهل وبتقدري تتحكمي برسم الآيلاينر بدقة . متل فرشة ماك210 ، أنا بستخدم الفرشة اللي بالصورة كانت مع مجموعة فرش اشتريتها من زماااان لا عليها اسم ولارقم .

النوع التاني اللي ممكن تستخدميه اللي هيي الفرشة المائلة بجس هاي الفرشة حلوة لو بدك تسوي آيلاينر عريض ، مثل فرشة ماك 263 ، في هاي الفرشة مرة جبتها من كليرز هيي بطرفين ، الفرشة رفيعة وكتير سهل الرسم فيها .

___________________________________

نصائح لإتقان الآيلاينر: 

الآيلاينر مارح تقدري تتعلميه من أول مرة لازم تتمرني كتييير لحتى يزبط معك وكل ماتمرنتي رح يطلع أحلى وأحلى ، وقت ترسمي الآيلاينر لازم تكون ايدك مسنودة على طاولة و أنتي عم ترسمي مشان ايدك ماترجف وهيك ، دايما خلي جنبك الأعواد تبع الأذن مشان لو خربطتي بسرعة تمسحي ، وقت تسوي خطوة على عين سويها فورا على العين الثانية هاد بيخلي العينين يكونو نفس بعض وبكون أسهل لك، وقت ترسمي خلي المراية من تحت يعني مو قدامك و اتطلعي لتحت , مشان تشوفي خط  الرموش وبكون أسهل ترسمي، متل الصورة تقريبا.

 

كمان خطوات ممكن تساعدك لتخلي العينين نفس الشي لأنو مرات بيطلع كل عين مختلفة عن التانية. استخدمي التيب (الشريط اللاصق الشفاف) بس لازم تلزقي على ايدك وتشيليه اكتر من مرة مشان مايكون عليه صمغ  وحطي على العينين ووقت تشوفي انو صارو نفس الشي ارسمي حتى بيساعدك بالرسم مشان يطلع مرتب ، حطي نفس الصورة، وحسب لو حبيتي لفوق شوي لتحت هاد الشي بيرجعلك.

  

لو مو حابة التيب بتقدري تسخدمي المنديل بنفس الطريقة 

وكمان بتقدري ترسمي خط بالكحل اختاري يكون لون فاتح أبيض أنسب شي لأنو بينمسح بسرعة ارسمي خط نفس اللي بالصورة على العينين ووقت تشوفي صارو متماثلين ارسمي فوقه الآيلاينر 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كيفية رسم الآيلاينر : 

رح ارسم بطريقتين استخدمت جل آيلاينر انتو بتستخدمو الفرشة اللي بتناسبكم :

هاد الآيلاينر بسيط وبناسب كل أشكال العيون تقريبا، استخدمت ميبلين جل آيلاينر والفرشة الرفيعة (موجودة بالصور فوق)

1-برسم خط رفيع ببدأ من الخارج أو الثلث الأخير من العين، لأن بكون في كتير مستحضر على الفرشة فلو بدأنا من العين من الداخل رح يصير عريض ،فبنبدأ من الخارج حتى يكون تأثير الآيلاينر أكتر .

2- بنكمل رسم الآيلاينر على خط الرموش وبنرسم الثلث الأول من العين أو الزاوية الداخلية  وبنوصل كل شي مع بعض . مشان يطلع  كله على مستوى واحد ، بتسوي الخطوتين على العينين مشان توازني بالأول قبل ما ترسمي الخط الخارجي .

3- بتاخدي الفرشة وبتمدي خط بتبدأي من زاوية العين نفس الصورة بتقدري تطولي تقصريه على راحتك سوي الخطوة عالعينين مشان توازني قبل ماتكملي اللوك. 

4- وصلي الخط الخارجي مع  خط الرموش 

5- بعدين عبي الفراغ بس كوني دقيقة مشان ماتطلعي لبرى.

 بهاد الآيلاينر استخدمت خطوات مختلفة شوي و استخدمت الفرشة المائلة(بالصور فوق) هاد صاير (cat eyes ) 

1- بدأت بالخط الخارجي بالأول ، بتحددي نقطة وبتمدي لتوصلي لخط االرموش ، ماتخلي طرف الآيلاينر يطلع عن مستوى حواجبك على هالأساس بتحددي النقطة ، مو عارفة كيف اشرح بالزبط بس شوفو الصورة ورح تفهمو شو بقصد.

2- وصلي من زاوية العين مع الخط اللي رسمتيه من قبل.

3-عبي الفراغات متل ماقلت بدقة مشان ما يخرب .

3-كملي ارسمي خط الرموش وارسمي زاوية العين الداخلية . 

_____________________________________________________________________

بتمنى تكونوا استفدتوا وفهمتوا على الشرح 

سلاام 3 >

Balm jovi rockstar pallet Review-بالم جوفي باليت

                                     السلام عليكم ورحمة الله وبركاته ~ 

  

اليوم رح احكي عن باليت من ذا بالم ( Balm jovi rockstar)، أنا حبيت هاي الباليت لأنو حسيت أنها شاملة وممكن نستفيد منها بكتير أشياء ونسوي فيها كتير لوكات، فيها 12 شدو (4 شدوهات مطفية و 8 شدوهات بلمعة ) وفيها بلاشر و إضاءة  (هايلايت) و روجين. حبيت جودة الباليت كل شي فيها ألوانه قوية وواضحة ، طبعاً ذا بالم مو متوفرة بالمملكة ، بس بتقدري تطلبيها من نفس موقع ذا بالم أو من عند تاجرات.

 رح أعمل سواتشات عن كل شي بالباليت واحكي عن كل شي فيها .
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
1- الشدوهات (الظلال): متل ماقلت فيها المطفي وفيها اللي بلمعة الألوان كتتيير ككتتير قوية وثابتة. حتى بلا برايمر بتطلع الألوان واضحة.بس أكيد أفضل مع برايمر 

1-  العمود الأول 

     

الألوان من فوق لتحت :

Matal-ica : صاير لون أبيض بلمعة قوية كتيير ممكن تستخدميه عند مدمع العين بس مابحس انو حلو تحت الحاجب لأنو لمعته كتير قوية

Iron Maid-in : هاد اللون صاير بيج بس فيو لمعة ذهبية لون صاير طبيعي وكتير كتير حلو. 

Lead Zeppelin : لون زيتي بلمعة ذهبية بس مو واضحة اللمعة بالصورة، هاد اللون حلو لو سويتي ميك اب سموكي . 

Alice copper:  هاد اللون صعب ينوصف يعني صاير بني محمر على شوي بنفسجي، هوي مو بني بني نفس اللي بالصورة .

2- العمود الثاني 

هاد العمود كلو ألوان مطفية، الألوان من فوق لتحت :

Adagio: لون بيج مطفي، بتسخدميه لو حبيتي إضاءة مطفية لتحت الحاجب. 

Allegro : لون بني فاتح، هاد اللون حبيتو لأنو ممكن تستخدميه لكتير أشياء ، مثلا لون لتدمجي الألوان وحتى ممكن تستخدميه للحواجب لو حواجبك فاتحة .

Moderato : لون بنفسجي  باذنجاني مطفي ، بينفع للسموكي .

presto : لون بني غامق مطفي ، كمان ممكن تستخدميه للحواجب لو حواجبك غامقة .

3- العمود الثالث : 

الألوان من فوق لتحت :

Blink 1982 : لون بنفسجي باهت شوي بيعطي على وردي فيو لمعة ذهبية خفيفة . 

The Stroke : لون كحلي غامق كتير  وفيو لمعة باللون الأزرق ، هاد اللون حلو يكون سموكي .

rem : لون بنفسجي فاتح  صاير لون ربيعي وفيو لمعة ذهبية خفيفة . 

Third eye Blinded: لون وردي فاتح كتيير طبيعي وحلو للوكات الناعمة. 

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

2 - البلاش ( أحمر الخدود):

Don't you want me :  لون وردي مو مطفي بشكل كامل بس لمعته خفيفة كتير ، يعني مابتبين كتير ، اللون كتير قوي يعني بس بتحتاجي شوي، لوكترتي بصير شكلو مبين مبالغ فيه . 

 ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

3- الإضاءة ( الهايلايت) : 

sold gold : إضاءة لونها جاي على بيج وفيها لمعة ذهبية ، هاي الإضاءة عنجد كتير حلو شكلها عالخد ، هيي بتشبه اضاءة ماري لو من ذا بالم (Mary Lou manizer )  

. ______________________________________________

 4 - الأرواج: 

هدول مو بس أرواج بس كمان تستخدم كبلاش كريمي، الألوان ثابتين  وكتير حلوين يعني أنا بحب أستخدمهم بطريقتين 1- أوزع اللون بفرشة مشان يطلع اللون قوي 2- بأصبعي أحط شوي عالشفاه بس مشان يعطي توريد للشفايف.بس العيب الوحيد هيي الريحة  انها متل البلاستيك مدري كيف انا ماحبيت الريحة.

Vanilly: هوي ببين لون أحمر غامق، بس وقت تحطيه ببين لون أحمر فاتح أو بطيخي، يعني حلو للناس اللي بتحب يكون لون أحمر هادي .

Milly: لون وردي كتتير طبيعي . 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

حتى الباليت فيها شي بساعدك ، حاطين الألوان اللي ممكن تستخدميها مع بعض لتسوي لوك  ولون الروج وهيك 

.................................................................

بتمنى تكونوا أستفدتوا ولو شوي  بعتذر الموضوع طويل بس حبيت أوضح كل شي بالتفصيل 

(Real Techniques (Core Collection | ريل تكنيك (كور كوليكشن)

السلام عليكم ورحمة الله وبركاته  ~ 

مجموعة فرش  من ريل تكنيك اسمها كور كوليكشن  ( (Real Techniques (Core Collection)، مؤلفة من 4 فرش للوجه .

رح أحكي عن كل فرشة بالمجموعة : 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ 

Buffing Brush -

هاي الفرشة للفاونديشن الحر أو المنثور  شعرها كثيف  وناعم وكتير مناسبة لتوزيع الفاونديشن مابتخطط الوجه ، بتقدري توزعي فيها الفاونديشن السائل والفاونديشن الباودر كمان  ،بتوزعي فيها الفاونديشن بحركات دائرية، بتقدري تستخدميها للباودر  والبرونزر كمان ، وممكن توزعي فيها البلاش ، يعني بتفيد بأكتر من شغلة .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ               

   Contour Brush -   

فرشاة الكونتور (نحت الوجه)،الفرشة مدورة وشعرها ناعم كتير حلوة للكونتور لأن حجمها صغير وبتدمج الكونتور بشكل حلو، كمان بستعملها للبلاش و ممكن توزعي فيها الإضاءة على الخدود.

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 pointed Foundation Brush -

هاي الفرشاة على الأساس أنها مخصصة لتوزيع الفاونديشن بس ماحبيت استعملها للفاونديشن لأنها كتير صغيرة لتوزيع الفاونديشن بعدين بتخطط الوجه  ، فصرت أستخدمها لتوزيع الكونسيلر أو حتى إضاءة للخدود .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

Detailer Brush -

  هاي الفرشة كتير صغيرة بتستخدميها لتغطية عيوب البشرة بالكونسيلر يعني لو كان عندك حبة وبدك تغطيها بكونسيلر بتستخدمي هاي الفرشة، أو بتقدري تستخدميها  لتوزيع الروج ، أو حتى بستخدميها للشدو تحت العين أو لتوزعي الإضاءة تحت الحاجب أو عند مدمع العين. يعني بتستخدميها لأمور كتيرة .   

 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ 

مجموعة الفرش بتنفع كتير ومتعددة الإستخدام ، فرش ريل تكنيك مو متوفرة بالمملكة ،مابعرف إذا متوفرة بأماكن أنا مابعرفها ، يعني لو بدك تشتريها بتاخديها من عند تاجرات أو بتطلبيها من موقع ريل تكنيك . 

فرش الميك اب الأساسية | the essential makeup brush

السلام عليكم ورحمة الله وبركاته~

الفرش شي أساسي بالميك اب،ومابنقدر نعمل ميك اب بلا فرش، فاليوم رح أحكي عن الفرش الأساسية اللي لازم تكون عندك، هو في كتير أنواع فرش بس أنا رح أحكي عن الأساسيات، واللي بتحتاجها أي وحدة .

أولاً: فرش الوجه 

1-فرشاة كريم الأساس:   بتقدري تستخدمي أصابعك للفاونديشن،و في أنواع مختلفة لفرش الفاونديشن، في الفرشاة اللي بتجي فلات أو منبسطة هاد النوع بتستخدميه لو حابة تخلي التغطية ثقيلة مثال: فرشاة ماك 190. فرشاة سيجما F60 .في منها بريل تكنيك. وفي بذي بودي شوب 

 لو حابة الفرشاة تعطيكي تغطية مو ثقيلة ، استخدمي الفرشاة اللي بتجي من فوق فلات وبتكون كثيفة وبتمزج الفاونديشن بشكل حلو مثال: فرشاة سيجما F80  

وفي بريل تكنيك ال Expert brush   

هاد بالنسبة للفاونديشن 

2-فرشاة الباودر :  الباودر بتقدري تستخدميله أي فرشاة تكون كبيرة وشعرها كثيف .في من ريل تكنيك وفي بماك 134 وسيجما . 

3-فرشاة الكونسيلر:  بتقدري تستغني عن فرشاة الكونسيلر وتستخدمي أصابعك . في فرشاة بتجي مروسة أنا بستخدم هاد النوع لأحط الكونسيلر مثال: F86  من سيجما 

 

أو تستخدمي فرشاة فلات لتحطي الكونسيلر مثال: ماك 195 

4-فرشاة الكونتور : دائما اختاري فرشاة الكونتور صغيرة ومدورة أو تكون مشطوفة اللي بتكون مايلة يعني . مشان تتحكمي باالكنتور بطريقة أفضل

مثال:الفرشاة المشطوفة168 ..وفرشاة مدورة 109 من ماك 

 

5-فرشاة البلاش: ممكن تستخدمي فرشاة الكونتور للبلاش . حجم فرشاة البلاش بحب ان يكون حجمها وسط، في كتير أنواع منها  . مثال: ماك168 (اللي نفسها للكونتور) .. فرشاة البلاش من ربل تكنيك .فرشاة ماك 116 .

6- فرشاة الإضاءة -الهايلايت-:  ممكن تستخدمي أصابعك لوضع الهيلايت ، أنا بستخدم (fan brush) أو فرشاة المروحة للهايلات  متل  فرشاة ماك 184 . وبتقدري تستخدمي فرشاة صغيرة للهيلايت متل ماك 224  

ثانياً: فرش العين: 

1- أول فرشاة هيي ال (shader brush) بتكون فلات . مسطحة . بتستخدميها لتمدي أي شدو على كامل الجفن .أول لتحطي الإضاءة تحت الحاجب مثال: فرشاة ماك239

 2- من أهم الفرش اللي هي فرشاة الدمج .  هاي الفرشاة لدمج الشدو بتكون مدورة من فوق مابعرف كيف أوصف الشكل بالزبط بس موجود الشكل بالصورة  . مهمة جدا لأن الشدو لو ماكان مدموج الشكل بكون سيء مثال: ماك 214  و سيجما E25 . في بذي بودي شوب فرشاة بتشبه هدول الفرشتين تقريبا  .

 3- (pencil brush) هاي الفرشاة بتكون صغيرة ومروسة بتستخدميها لدمج الشدو تحت العين أو لتحطي إضاءة عند مدمع العين أو لو بدك تحطي لون غامق كتير على جفن العين وبدك تحطي شوي مثال : فرشاة ماك 219 .. وفي كمان باسينس فرشاة بتشبها تقريباا.

 4- فرشاة الجل لاينر لو كنتي بتستخدمي الجل لاينر عندك نوعين لفرش الآيلاينر .أول وحدة اللي بتكون مشطوفة أو مايلة متل ماك 263 بتكون مشطوفة رفيعة . والنوع التاني اللي بتكون متل الريشة بتكون كتير رفيعة  متل ماك 210أنا بحب أستخدم هاد النوع أكتر بحس أسهل من الفرشاة المشطوفة 

 5- فرشاة الحواجب لوكنتي بتستخدمي بودرة الحواجب . هي بتكون مشطوفة بتشبه تبع الآيلاينر بس تبع الآيلاينر رفيعة وتبع الحواجب أعرض شوي. متل فرشاة ماك208

تقريبا عدد الفرش الأساسية 11 فرشاة أنتي بتقدري تستغني عن اللي مابتحتاجيه أو تستخدمي الفرشاة الوحدة لشغلتين (متل الكونتور والبلاش) ، وطبعا مو بالضرورة الفرش بس من ماك وسيجما وريل تكنيك بس أنا ذكرت هاي الأمثلة لأنو أقرب شي وأكتر شي معروف . في كتيير محلات بتبيع فرش جودتها جيدة متل ذي بودي شوب ممكن مكياجي .

بتمنى يكو كل شي واضح ومفيد =)  

how to perfect the lipstick! كيف تتقني وضع الروج !

السلام عليكم ورحمة الله وبركاته ~ 

اليوم رح أتكلم عن كيفية اتقان وضح الروج وكيف تخليه ثابت لفترة أطول. بس اتبعي هاي الخطوات البسيطة :

1- ليكون شكل الروج أو الليب ستيك حلو.. لازم تقشري شفايفك ، لأن وقت بتحطي الروج وشفايفك فيها جلد ميت بيطلع الشكل سيئ  بالذات اذا كان الليب ستيك احمر ..مقشر الشفاه بتقدري تشتريه، أو تسويه بنفسك بالبيت بس اخلطي فازلين وسكر أو زيت زيتون وسكر وقشري شفايفك وبس  

2-لازم ترطبي شفايفك ، استخدمي اي مرطب بيناسبك.

3- استخدمي برايمر العيون (eye primer)-مثبت الشدو- ، بيسوي نفس الشي هوي بيثبت الشدو واذا حطيتيه على الشفاه بيثبت الروج ، لو موحابة تستخدمي البرايمر بتقدري تستخدمي الكونسيلر ، بس ماتحطي كتير حطي نقطة صغيرة ومديها على الشفاه ، لو حطيتي كتير رح يخرب الشكل . 

4- استخدمي محدد الشفاه الليب لاينر (lip liner)، موبس تحطيه على الحدود حطيه على كل الشفاه . استخدمي ليب لاينر نفس لون درجة الروج .أو أغمق أو أفتح بشوي.

5-  حطي الليب ستيك أو الروج . 

6- مشان نثبت الروج ، حنستخدم منديل، المنديل بكون فيه طبقتين خدي طبقة وحدة وحطيها على الشفاه وجيبي فرشاه وحطي عليها بودرة ـ وحطي الباودر على الشفاه من فوق المنديل ، المنديل بيمتص الزيوت اللي بالروج ، استخدمنا المنديل لأنه لو حطينا البودرة مباشرة على رح تخرب الروج 

بتقدري تحطي طبقة ثانية من الروج وتكرري الخطوة الأخيرة لو حابة ثبات أكثر 

بتمنى تكونوا استفدتوا D =